40 फूट दरीत दुचाकी कोसळली :  दाम्पत्याची सुखरूप सुटका

सौंदत्ती : येथील यल्लम्मा डोंगर  मार्गावरील स्पिनिंग मिलजवळ दुचाकी घसरून सुमारे 40 फूट खोल दरीत कोसळली. त्या दुचाकीवरील दाम्पत्य देखील दुचाकीबरोबर त्या दरीत कोसळले. पण, अग्निशामक व आपत्कालीन सेवा विभागाच्या जवानांनी तत्काळ बचावकार्य करून त्या दोघांची सुखरूप सुटका केली.

पवनकुमार नायक (30) आणि  अर्पिता नायक  (23), रा. उणकल, हुबळी अशी सुखरूप सुटका करण्यात आलेल्या त्या दाम्पत्याची नावे आहेत. 
हे दाम्पत्य यल्लम्मा देवीचे दर्शन घेऊन परतत असताना त्यांच्या दुचाकीवरील नियंत्रण सुटल्याने वाहन थेट दरीत कोसळले.
दरीच्या तळाशी असलेल्या दाट झुडपांमुळे आणि वनस्पतींमुळे दोघांचाही जीव वाचला. अपघाताची माहिती मिळताच अग्निशमन दलाचे कर्मचारी घटनास्थळी दाखल झाले आणि त्यांनी दोघांना खांद्यावरून उचलून सुरक्षित बाहेर आणले.
प्राथमिक उपचारांसाठी त्यांना तालुका रुग्णालयात दाखल करण्यात आले. त्यानंतर अधिक उपचारांसाठी त्यांना हुबळीतील किम्स इस्पितळ (KIMS Hospital)  येथे हलविण्यात आले.
या बचाव मोहिमेत सुनील तेलागर, अशोक रुद्रगौडर, जंगलीसाब दोडमणी, आनंद हिडकल्ल, मंजुनाथ मडिवाळर आणि आर. नवीनकुमार यांनी सहभाग घेतला.