बेळगाव :  सीपीआय श्रीशैल चौगले यांनी केली आत्महत्या

बेळगाव : राज्य आपत्ती प्रतिसाद दलाच्या (SDRF) सीपीआय पदावर कार्यरत असलेले श्रीशैल चौगले (वय 37) यांनी गळफास लावून घेऊन आत्महत्या केल्याची दुर्दैवी घटना गुरुवारी उघडकीस आली आहे.

शहरातील चन्नम्मानगर येथील त्यांच्या राहत्या घरी त्यांनी हे टोकाचे पाऊल उचलले. गुरुवारी पहाटे त्यांच्या खोलीचा दरवाजा आतून बंद असल्याचे लक्षात आल्यानंतर पत्नीला संशय आला. त्यांनी तात्काळ एसडीआरएफ कर्मचाऱ्यांना माहिती दिली. घटनेची माहिती मिळताच कर्मचारी घटनास्थळी दाखल झाले आणि दरवाजा तोडून चौगले यांना बाहेर काढले. त्यानंतर त्यांना तातडीने रुग्णालयात हलविण्यात आले. मात्र, डॉक्टरांनी त्यांना मृत घोषित केले.
 श्रीशैल चौगले यांनी आत्महत्या का केली याचे नेमके कारण अद्याप समोर आलेले नाही. या अचानक घडलेल्या घटनेमुळे कुटुंबीय, सहकारी आणि मित्रपरिवारावर शोककळा पसरली आहे. मृतदेह पुढील शवविच्छेदनासाठी बिम्स रुग्णालयाच्या शवागारात ठेवण्यात आला आहे.
या प्रकरणी उद्यमगबाग पोलीस ठाण्यात गुन्हा नोंद करण्यात आला असून, पोलिस अधिक तपास करत आहेत.