आणि आमदारांनी केली अधिकाऱ्यांची कानउघाडणी ..!

बेळगाव : आरपीडी सर्कल परिसरात भूमिगत गटार (यूजीडी)  समस्येने नागरिकांना त्रस्त केले आहे. गेल्या अनेक महिन्यांपासून ही समस्या आ वासून उभी असून रस्त्यावरून वाहणारे दुर्गंधीयुक्त पाणी लोकांचे जाणे-येणे मुश्कील करीत आहे.

आमदार अभय पाटील यांनी संबंधित अधिकाऱ्यांसह या परिसराची पाहणी करून अधिकाऱ्यांची कानउघाडणी केली.

वार्ड क्रमांक 29 मधील आरपीडी सर्कल परिसरात गेल्या अनेक महिन्यांपासून नागरिकांना त्रास देत असलेल्या भूमिगत गटार (यूजीडी) समस्येच्या निराकरणासाठी अखेर हालचाली सुरू झाल्या आहेत. स्थानिकांच्या तक्रारीची दखल घेत आमदार अभय पाटील यांनी  नगरसेवक नितीन जाधव तसेच महानगरपालिकेच्या संबंधित अधिकाऱ्यांसोबत आरपीडी सर्कल परिसराची पाहणी केली. यावेळी त्यांनी तेथील गंभीर यूजीडी समस्येची प्रत्यक्ष माहिती घेतली.
गेल्या अनेक महिन्यांपासून या भागातील यूजीडी लाईन तुंबल्यामुळे सांडपाणी रस्त्यावर वाहत होते. त्यामुळे शाळा व महाविद्यालयीन विद्यार्थ्यांसह स्थानिक नागरिकांना ये-जा करताना मोठ्या अडचणींचा सामना करावा लागत होता.
या गंभीर समस्येची दखल घेत आमदार अभय पाटील यांनी नागरिक व विद्यार्थ्यांच्या हिताचा विचार करून तातडीने योग्य ती उपाययोजना करण्याचे निर्देश अधिकाऱ्यांना दिले. तसेच ही समस्या कायमस्वरूपी सोडविण्यासाठी आवश्यक कामे प्राधान्याने पूर्ण करण्याचे आदेश देत नागरिकांची गैरसोय दूर करण्यावर भर दिला.
स्थानिकांनी आमदारांच्या या तात्काळ हस्तक्षेपाचे स्वागत करत लवकरच परिसरातील यूजीडी समस्या पूर्णपणे मार्गी लागेल, अशी अपेक्षा व्यक्त केली आहे.

#abhaypatil
#rpdcross 
#ugdproblem