जिन्यावरून खाली पडून 2 वर्षीय चिमुकल्याचा दुर्दैवी मृत्यू

नेलमंगल : घरात खेळत असताना पहिल्या मजल्यावरून पडल्याने 2 वर्षीय चिमुकल्याचा मृत्यू झाल्याची हृदयद्रावक घटना बेंगळूर ग्रामीण जिल्ह्यातील नेलमंगल तालुक्यातील तोटदगुड्डदहळ्ळी येथे घडली.
मृत मुलाचे नाव दीक्षित असे आहे. अपघातानंतर दीक्षित तब्बल 24 तास कोमामध्ये होता. मात्र उपचार सुरू असतानाच त्याची प्राणज्योत मालवली.
घटनेची माहिती मिळताच मादनायकनहळ्ळी पोलिसांनी घटनास्थळी भेट देऊन पाहणी केली. दासरहळ्ळी येथील नवीन कुमार आणि काव्या हे दाम्पत्य आपल्या मुलासह दोन दिवसांपूर्वी नातेवाईकांच्या घरी आले होते. यावेळी घरात खेळत असताना दीक्षित हा इमारतीच्या पहिल्या मजल्यावरील जिन्यावरून खाली कोसळला.
अपघातानंतर पालकांनी तातडीने त्याला स्थानिक रुग्णालयात दाखल केले. मात्र उपचारांना प्रतिसाद न मिळाल्याने त्याचा मृत्यू झाला. मृतदेह शवविच्छेदनासाठी नेलमंगळ येथील शवागारात पाठविण्यात आला आहे.
चिमुकल्या मुलाच्या निधनामुळे कुटुंबावर दुःखाचा डोंगर कोसळला असून, पालकांचा आक्रोश पाहून परिसरात हळहळ व्यक्त होत आहे.