करंबळ ग्रामपंचायत पिडीओंच्या निलंबनाची होतेय मागणी ..!

खानापूर : करंबळ ग्रामपंचायतीचे ग्रामविकास अधिकारी (पीडीओ) गांधी एल्लारी गौडा यांनी करंबळ येथील ज्येष्ठ व प्रतिष्ठित नागरिक तसेच मराठा मंडळ शिक्षण संस्थेचे संचालक शिवाजी पाटील यांच्याशी अवमानकारक व अरेरावीची भाषा वापरल्याचा गंभीर आरोप समोर आला आहे. या घटनेमुळे करंबळसह ग्रामपंचायत हद्दीतील नागरिकांमध्ये संतापाची लाट उसळली असून संबंधित अधिकाऱ्यावर चौकशी करून कठोर शिस्तभंगाची कारवाई व निलंबनाची मागणी होत आहे.

मिळालेल्या माहितीनुसार, शिवाजी पाटील यांच्या घरासमोरील गटारात अनेक दिवसांपासून कचरा व सांडपाणी तुंबून राहिल्याने परिसरात अस्वच्छतेचे वातावरण निर्माण झाले होते. याबाबत त्यांनी ग्रामपंचायतीकडे वारंवार पाठपुरावा करून गटार स्वच्छ करण्याची मागणी केली होती. मात्र, या मागणीकडे दुर्लक्ष करण्यात आल्याचा आरोप आहे.
अखेरीस या प्रश्नाबाबत जाब विचारण्यासाठी शिवाजी पाटील यांनी पीडीओ गांधी एल्लारी गौडा यांच्याशी संपर्क साधला. यावेळी गटार स्वच्छतेची मागणी केल्यावर संबंधित अधिकाऱ्यांनी उद्धट व अरेरावीच्या सुरात उत्तर दिल्याचा आरोप करण्यात आला आहे. “तुमच्या घरासमोरील गटार स्वच्छ करणार नाही, कुणाकडे जायचे ते जा, कोणाला सांगायचे ते सांगा, काय करायचे ते करा,” अशा प्रकारची भाषा वापरून ज्येष्ठ नागरिकांचा अपमान केल्याचे सांगितले जात आहे.
या घटनेमुळे ग्रामस्थांमध्ये तीव्र नाराजी व्यक्त होत असून, समाजात मानाचे स्थान असलेल्या व्यक्तीशी अशा प्रकारची वागणूक देणे हे निषेधार्ह असल्याची प्रतिक्रिया नागरिकांकडून व्यक्त केली जात आहे. लोकसेवक म्हणून काम करणाऱ्या अधिकाऱ्यांकडून अपेक्षित असलेली जबाबदारी, संयम आणि नागरिकांप्रती आदरभाव या प्रकरणात दिसून आला नसल्याचा आरोप ग्रामस्थांनी केला आहे.
दरम्यान, करंबळ ग्रामपंचायतीच्या कारभाराबाबतही नागरिकांमध्ये नाराजी वाढली असून संबंधित पीडीओ मनमानी पद्धतीने काम करत असल्याची चर्चा परिसरात सुरू आहे. त्यामुळे संपूर्ण प्रकरणाची वरिष्ठ अधिकाऱ्यांकडून सखोल चौकशी करून दोषींवर कठोर कारवाई करण्यात यावी, अशी मागणी नागरिकांनी केली आहे.
याप्रकरणी तातडीने कारवाई न झाल्यास करंबळ व परिसरातील नागरिक लोकशाही मार्गाने आंदोलन छेडण्याचा इशारा देत असून प्रशासनाने या प्रकरणाची गांभीर्याने दखल घ्यावी, अशी मागणी जोर धरत आहे.