हिंडलगा येथील हुतात्मा स्मारक भवनाचे भूमिपूजन केले जाणार 30 मार्च रोजी

बेळगाव( bn7 news) : हिंडलगा येथील हुतात्मा स्मारक नियोजित भवनाचे भूमिपूजन गुढी पाडव्याच्या शुभमुहूर्तावर दिनांक 30 मार्च रोजी केले जाणार आहे.

बेळगाव तालुका महाराष्ट्र एकीकरण समितीच्या पुढाकाराने हुतात्मा स्मारक भवनाची उभारणी करण्यात येणार आहे . 30 मार्च रोजी सायंकाळी 4 वाजता मान्यवरांच्या हस्ते भूमिपूजन सोहळा पार पाडण्यात येणार आहे. प्रसिद्ध सिव्हिल इंजीनियर आणि बेळगाव तालुका महाराष्ट्र एकीकरण समितीचे कार्याध्यक्ष आर एम चौगुले यांच्या हस्ते भूमिपूजन होणार आहे.

1995 साली तालुका महाराष्ट्र एकीकरण समितीच्या पुढाकाराने हिंडलगा येथे जागा खरेदी करण्यात आली होती.गेल्या या जागेवर अनेक वर्षापासून हुतात्मा स्मारक भवन उभे राहावे अशी सीमावासीयांची इच्छा होती. जवळपास 30 वर्षे प्रतीक्षेत असणाऱ्या हुतात्मा भवनच्या कामाला अखेर गुढीपाडव्याचा शुभ मुहूर्तावर सुरुवात केली जाणार आहे.
भूमिपूजन सोहळ्याला समितीचे आजी -माजी लोकप्रतिनिधी, देणगीदार सर्व घटक समित्यांचे पदाधिकारी आणि सीमा भागातील जनतेने मोठ्या संख्येने उपस्थित राहण्याचे आवाहन बेळगाव तालुका महाराष्ट्र एकीकरण समितीच्या वतीने अध्यक्ष माजी आमदार मनोहर किणेकर, कार्याध्यक्ष आर एम चौगुले आणि सचिव एम जी पाटील यांनी केले आहे.