अंगावर झाड पडून एकाचा मृत्यू

कोप्पळ : वादळी-वाऱ्यासह झालेल्या पावसामुळे कोसळलेले झाड अंगावर पडून एका तरुणाचा मृत्यू झाला. कोप्पळ तालुक्यातील कामनूरजवळ ही घटना घडली. या घटनेत आणखीन एक व्यक्ती जखमी असून त्याला उपचारासाठी जिल्हा रुग्णालयात दाखल करण्यात आले आहे.

कोप्पळ जिल्ह्यात वादळी-वाऱ्यासह मुसळधार पाऊस सुरूच आहे. वादळी पावसामुळे कोसळलेले झाड किरण करबडीगे नामक दुचाकीस्वाराच्या अंगावर पडले. यामध्ये त्याचा मृत्यू झाला. दुचाकीवर बसलेली आणखीन एक व्यक्ती जखमी असून त्या व्यक्तीवर कोप्पळ जिल्हा रुग्णालयात उपचार सुरू आहेत. 

हवामान विभागाच्या अंदाजानुसार, जिल्ह्यात 29 मे पर्यंत मुसळधार पाऊस आणि वादळ सुरू राहण्याची शक्यता आहे. अधिकाऱ्यांनी जनतेला आवश्यक खबरदारी घेण्याचा सल्ला दिला आहे.  वादळी वाऱ्यासह होणाऱ्या पावसावेळी झाडाखाली थांबू नका, अनावश्यकपणे बाहेर जाणे टाळा, वाहन चालवताना अधिक काळजी घ्या अशी सूचना हवामान खात्याने केली आहे.