गटारीचे बांधकाम अर्धवट : कावळेवाडी ग्रामस्थ झालेत त्रस्त

बेळगाव : अर्धवट अवस्थेत बांधकाम झालेल्या त्या गटारीमुळे कावळेवाडी ग्रामस्थ त्रस्त झाले असून त्यांनी या अर्धवट अवस्थेत पडलेल्या गटारीचे बांधकाम त्वरित पूर्ण करून ग्रामस्थांचा त्रास दूर करावा, अशी मागणी ग्रामपंचायतीकडे केली आहे.

बिजगर्णी ग्रामपंचायत कार्यक्षेत्रातील कावळेवाडी गावात राबविण्यात आलेल्या विकास कामांतर्गत बांधण्यात आलेल्या गटारीचे काम अर्धवट अवस्थेत पडले आहे. यामुळे या भागातील नागरिकांना मोठ्या समस्यांना सामोरे जावे लागत आहे. अर्धवट अवस्थेत पडलेली या गटार वजा चरित केर कचरा आणि सांडपाणी तुंबले असून परिसरात दुर्गंधी पसरली आहे. इतकेच नाही तर तुंबलेल्या घाणीमुळे डासांचा प्रादुर्भाव वाढला असून यामुळे नागरिक त्रस्त झाले आहेत.
मागील वर्षी सुरू करण्यात आलेले गटारीचे बांधकाम अद्याप पूर्ण झालेले नाही. गटार बांधणीसाठी सांडपाणी अडवून ठेवण्यात आल्याने पाणी तुंबून त्याला गटार गंगेचे स्वरूप प्राप्त झाले आहे. गटारीतून पाणी वाहून जाण्यास मार्ग नसल्याने अवकाळी पावसात पाणी थेट घरांमध्ये शिरण्याची शक्यता नाकारता येत नाही.
नागरिकांचे आरोग्य धोक्यात आणणाऱ्या आणि ग्रामस्थांना त्रस्त करणाऱ्या या गटारीचे बांधकाम त्वरित पूर्ण करून लोकांचा त्रास थांबवावा अशी मागणी ग्रामपंचायत अधिकाऱ्यांना अनेकवेळा करूनही काम पूर्ण करण्याकडे दुर्लक्ष होत असल्याचा आरोप स्थानिक रहिवाशांतून केला जात आहे.
गटारीचे अर्धवट अवस्थेत पडलेले काम तातडीने पूर्ण करण्यात यावे, अशी मागणी नागरिकांतून ग्रामपंचायतीकडे केली जात आहे.