हिडकल जलाशय पडत चाललंय कोरडं ...! केवळ 8 टीएमसी इतकंच पाणी राहिलंय शिल्लक ..!

चिक्कोडी :  बेळगाव आणि बागलकोट अशा दोन जिल्ह्यांचे  जीवनदायी स्रोत म्हणून ओळखले जाणारे हिडकल जलाशय (राजा लखमगौडा जलाशय) कोरडे पडत चालले असून पावसाळ्याला अजून काही दिवस बाकी असतानाच जलाशयाची पाणी पातळी खालावत चालल्याने दोन्ही जिल्ह्यांतील नागरिकांमध्ये तीव्र चिंता निर्माण झाली आहे.

एकूण 51 टीएमसी पाणी साठवण क्षमता असलेल्या या जलाशयात सध्या केवळ 8 टीएमसी इतकंच पाणी उरलं आहे. अलीकडच्या वर्षांत उन्हाळा संपण्यापूर्वीच जलाशय इतक्या मोठ्या प्रमाणात आटल्याची ही पहिलीच वेळ मानली जात आहे.

हा जलाशय केवळ शेतीसाठीच नव्हे, तर पिण्याच्या पाण्याचाही मुख्य स्रोत आहे. बेळगाव महानगर , हुक्केरी आणि संकेश्वर शहरांसह 100 हून अधिक गावांना याच जलाशयातून पाणीपुरवठा केला जातो. तसेच बेळगाव आणि बागलकोट जिल्ह्यांतील अनेक दुष्काळग्रस्त भागांना सिंचन योजनांद्वारे या धरणातून पाणी दिले जात होते. मात्र सध्याच्या पाण्याच्या टंचाईमुळे या योजनांवरही मर्यादा येण्याची शक्यता आहे.
दरम्यान, परिसरातील तापमान दिवसेंदिवस वाढत असून, पुढील काही दिवसांत समाधानकारक पाऊस झाला नाही, तर जलाशयातील उरलेलं पाणीही आटून जलाशय ‘डेड स्टोरेज’ स्तरावर जाण्याची भीती व्यक्त केली जात आहे.
ही गंभीर परिस्थिती लक्षात घेऊन , “उरलेलं पाणी शेती किंवा इतर वापरासाठी सोडू नये. भविष्यात माणसं व जनावरांसाठी पिण्याच्या पाण्याची टंचाई निर्माण होऊ नये म्हणून ते केवळ पिण्याच्या वापरासाठी राखून ठेवावं,” अशी मागणी सुज्ञ नागरिकांतून प्रशासनाकडे केली गेली आहे.