बेळगाव : फिनिक्स क्रिकेट अकादमी आयोजित 11 वर्षाखालील मुलांच्या ' ए टू चषक ' क्रिकेट स्पर्धेला शानदार प्रारंभ झाला. उद्घाटनाच्या सामन्यात एसकेई संघाने फिनिक्स अकादमी संघाचा पराभव करून विजयी सलामी दिली. अष्टपैलू कामगिरी केलेल्या एसकेई संघाचा खेळाडू श्रेयस पाटील हा सामनावीराचा मानकरी ठरला.
नाणेफेक जिंकून प्रथम फलंदाजी करताना एसकेई संघाने 20 षटकात 5 गडी गमावून 169 धावा काढल्या. श्रेयस पाटीलने चार चौकारसह 31 धावा काढल्या. सक्षम चव्हाणने 5 चौकारसह 28 धावांची खेळी केली. अश्वत कुलकर्णीने 2 चौकारासह 23 धावा काढल्या. फिनिक्सतर्फे विनोद पाटीलने 2 गडी बाद केले.
प्रत्युत्तरादाखल खेळताना फिनिक्स क्रिकेट अकादमी संघाने 20 षटकात 134 धावा काढल्या. भूमी हिने 2 चौकारासह 24 धावा काढल्या. नक्ष याने 10 धावा काढल्या. एसकेई संघातर्फे श्रेयस पाटील, विमान शिंगेरी व विवान एस यांनी प्रत्येकी 2 गडी बाद केले
उद्घाटन समारंभाला प्रमुख पाहुणे म्हणून काकती गावचे सामाजिक कार्यकर्ते माजी तालुका पंचायत सदस्य यल्लाप्पा कोळेकर, पुरस्कर्ते पवन माळदकर , नागेश तारीहाळकर, चेतन गवी, सुनील गाडीवडर, महांतेश गवी, सुनील देसाई, समर्थ कुडचीकर, दीपक भोसले आदी मान्यवर उपस्थित होते.
प्रारंभी खेळाडूंच्या हस्ते पाहुण्यांचे पुष्पगुच्छ देऊन स्वागत करण्यात आले. पवन माळदकर यांनी श्रीफळ वाढवून स्पर्धेचे उद्घाटन केले. याप्रसंगी यल्लाप्पा कोळेकर यांनी खेळाडूंना मार्गदर्शन केले. त्यांच्याच हस्ते नाणेफेक करून सामन्याला चालना देण्यात आली.
#cricketnews
#belgaum
#sports
#shreyashpatil
#ske
