अस्वलाच्या हल्ल्यात  शेतकरी गंभीर जखमी

बेळगाव : अस्वलाच्या हल्ल्यात शेतकरी गंभीर जखमी झाला. 

खानापूर तालुक्यातील जांबोटी जवळील हुलंद गावालगतच्या जंगल परिसरात ही घटना घडली आहे. महेश गावडे (वय 25,  रा. हुलंद ) असे अस्वलाच्या हल्ल्यात गंभीर जखमी झालेल्या तरुण शेतकऱ्याचे नाव आहे.
मिळालेल्या माहितीनुसार, महेश गावडे हे नेहमीप्रमाणे आपली गाय चारण्यासाठी गावालगतच्या जंगल परिसरात गेला होता. दिवसभर जनावरे चारून तो संध्याकाळी घरी परतत असताना झुडपांमधून अचानक बाहेर आलेल्या अस्वलाने त्यांच्यावर हल्ला चढवला.
जीव वाचवण्यासाठी महेश यांनी जवळच्या झाडावर चढण्याचा प्रयत्न केला. मात्र अस्वलाने त्यांचा पाठलाग करत त्यांच्या पायाचा जोरदार चावा घेतला. या हल्ल्यात महेश याच्या पायाला गंभीर दुखापत झाली असून तो रक्ताच्या थारोळ्यात पडला होता.
घटनेची माहिती मिळताच ग्रामस्थांनी घटनास्थळ गाठून त्याला तातडीने बेळगाव येथील खासगी रुग्णालयात दाखल केले. सध्या त्यांच्यावर आपत्कालीन उपचार सुरू असून त्यांची प्रकृती चिंताजनक असल्याचे सांगण्यात येत आहे.
दरम्यान, जंगलालगतच्या गावांमध्ये वन्यप्राण्यांचा वाढता वावर आणि हल्ल्यांच्या घटनांमुळे स्थानिक ग्रामस्थांमध्ये भीतीचे वातावरण निर्माण झाले आहे. वन विभागाने तातडीने उपाययोजना कराव्यात, अशी मागणी नागरिकांकडून करण्यात येत आहे.