स्टार एअरकडून बेळगाव विमानसेवेचा विस्तार

बेळगाव : स्टार एअर एप्रिल-मे महिन्यापासून आपल्या बेळगावमधील सेवा विस्तारण्याच्या तयारीत असून, स्टार एअरकडून नव्या मार्गांची सुरुवात तसेच अत्याधुनिक सेवांची अंमलबजावणी करण्यात येणार आहे. यामुळे प्रादेशिक संपर्क सुधारण्यास मदत होणार आहे.

या विस्ताराच्या भाग म्हणून, कंपनी अत्याधुनिक Embraer E175 विमान निवडक मार्गांवर तैनात करणार असून, या विमानात व्यवसाय वर्गाच्या केबिनची सुविधा असणार आहे. यामुळे प्रवाशांना अधिक आरामदायी आणि सुखद प्रवासाचा अनुभव मिळणार आहे. मे महिन्यापासून हे विमान बेळगाव–मुंबई–कोल्हापूर मार्गावर धावणार आहे, ज्यामुळे प्रवाशांच्या संख्येत वाढ होणार आहे.

स्टार एअरच्या या विस्तारात पुढील नव्या मार्गांचा समावेश राहणार आहे.

बेळगाव–जयपूर–बेळगाव: ही सेवा उडान योजनेअंतर्गत सुरू राहणार असून, परवडणाऱ्या दरात प्रवास शक्य होणार आहे.

बेंगळुर–बेळगाव–बेंगळुर : एप्रिलच्या मध्यापासून सेवा पुन्हा सुरू होणार.

बेळगाव–पुणे–बेळगाव: एप्रिलच्या मध्यातच सुरू होण्याची शक्यता.

बेळगाव–हैदराबाद–बेळगाव: ही नवी सेवा मे महिन्याच्या मध्यापासून सुरू होणार.

“प्रादेशिक विमानसेवा वाढवणे आणि प्रवाशांना चांगली सेवा देणे हे आमचे मुख्य उद्दिष्ट आहे. व्यवसाय वर्गासह अत्याधुनिक Embraer E175 विमानाची सुरूवात आमच्यासाठी एक महत्त्वाचा टप्पा आहे. हे नवे मार्ग व्यवसाय आणि पर्यटन प्रवाशांना अधिक सुलभ आणि वेगवान जोडणी देतील, तसेच प्रादेशिक विकास आणि आर्थिक संधींना चालना देतील.” असे स्टार एअरच्या मुख्य व्यापारी आणि विपणन अधिकारी शिल्पा भाटिया यांनी म्हटले आहे.