ओढ्याच्या पात्रात बुडून 8 जणांचा मृत्यू

भटकळ : शिंपले गोळा करण्यासाठी ओढ्याच्या पात्रात उतरलेल्या 8 जणांचा बुडून मृत्यू झाल्याची दुर्दैवी घटना तालुक्यातील शिराळी येथील अळवेकोडी जवळ तट्टीहक्कल कळिनट्टी येथे 
आज रविवार दिनांक 25 रोजी घडली आहे.
मृतांमध्ये पडुशिराळी बेन्ग्रे येथील लक्ष्मी महादेव नाईक (42 ), शारदाहोळे येथील उमेश नाईक ( 30 ), लक्ष्मी नाईक ( 30), लक्ष्मी अण्णप्पा नाईक (60), लक्ष्मी शिवराम नाईक (49), ज्योती नागप्पा नाईक (34), मालती नाईक (38) आणि मास्तम्मा नाईक यांचा समावेश आहे. अळवेकोडी परिसरात सर्वांचे मृतदेह आढळून आले आहेत.
मिळालेल्या माहितीनुसार, शिंपले गोळा करण्यासाठी ओढ्याच्या पात्रात उतरलेले हे सर्व जण एकमेकांचे हात धरून पुढे जात होते. मात्र, रात्री उशिरा झालेल्या मुसळधार पावसामुळे नदीतील पाण्याचा प्रवाह वाढला होता. तसेच समुद्रातील भरतीमुळे पाण्याची पातळी वाढल्याने ही दुर्घटना घडल्याचा अंदाज आहे.
या घटनेत नागरत्ना आणि महादेवी या दोघी बचावल्या असून त्यांना उपचारासाठी मणिपाल येथे हलविण्यात आले आहे. आणखी काही जण बेपत्ता असल्याची शक्यता असून त्यांचा शोध सुरू असल्याची माहिती भटकळ पोलीस ठाण्याने दिली आहे.