त्या दोघांचा मृत्यू : होतेय हळहळ व्यक्त

बेळगाव : सिलेंडर गॅस गळतीमुळे आगीचा भडका उडून गंभीर जखमी झालेल्या दाम्पत्याचा शुक्रवारी मृत्यू झाला.
बेळगाव तालुक्यातील सुळगा हिंडलगा येथील शंकर गल्लीतील येथे शनिवार दिनांक 18 मे रोजी ही घटना घडली होती.

या घटनेत कल्लाप्पा यल्लाप्पा पाटील (वय 65) आणि त्यांच्या पत्नी सुमन कल्लाप्पा पाटील ( वय 61) हे गंभीर जखमी झाले होते. गंभीर जखमी झालेल्या या दाम्पत्याला उपचारासाठी जिल्हा इस्पितळात दाखल करण्यात आले होते. त्यानंतर अधिक उपचारासाठी त्यांना खाजगी इस्पितळात हलविण्यात आले होते. सहा दिवस त्यांच्यावर उपचार सुरू होते. सहा दिवस मृत्यूशी झुंज देणाऱ्या या दाम्पत्याचा शुक्रवारी 24 रोजी मृत्यू झाला.
रात्री रेग्युलेटर मधून गॅस गळती होऊन घरात गॅस पसरला होता. झोपेत या दाम्पत्याला हे कळलेच नाही. पहाटे उठून स्वयंपाक घरातील दिवा लावण्यासाठी बटन दाबताच आगीचा भडका उडाला आणि ती दुर्घटना घडली होती.

@@@@@@@@@@@@@@@@@@@@@@@

आवळल्या’ छोटू’ च्या मुसक्या

हुबळी : रामेश्वरम कॅफे बॉम्बस्फोट प्रकरणी एनआयए ने हुबळीतील रहिवासी शोएब अहमद मिर्झा उर्फ छोटू याच्या मुसक्या आवळल्या आहेत.
याप्रकरणी अटक करण्यात आलेल्या आरोपींची संख्या आता पाच वर पोहोचलेली आहे.
शोएब उर्फ छोटू हा 35 वर्षीय तरुण लष्कर-ये-तोयबा संघटनेने 2012 मध्ये घडवलेल्या घातपाताच्या कटात सहभागी होता. याप्रकरणी शिक्षा भोगून तो कारागृहातून मुक्त झाला आहे. आता त्याचा बेंगळुरूच्या रामेश्वरम कॅफे स्फोट प्रकरणात सहभाग असल्याचा संशय असल्याने त्याला अटक करण्यात आले आहे.