बेळगाव : ज्युनियर मि. इंडिया शरीरसौष्ठव स्पर्धेत पश्चिम बंगालचा शरीरसौष्ठवपटू अंकुन गुहा याने आपल्या पिळदार शरीरयष्टीचे दर्शन घडवत ‘ ज्युनियर मिस्टर इंडिया ‘ किताब पटकावला. तर आसामचा शरीरसौष्ठवपटू दिलीप दिओरी हा मास्टर मिस्टर इंडिया टायटलचा मानकरी ठरला.
कुचबिहार येथे इंडिअन बॉडी बिल्डिंग फेडरेशन आयोजित 57 वी कनिष्ठ राष्ट्रीय शरीरसौष्ठव स्पर्धा झाली. 13 राज्यातून जवळपास 97 शरीरसौष्ठवपटू या स्पर्धेत सहभागी झाले होते.
या स्पर्धेत बेळगावच्या शरीरसौष्ठवपटूंनीही प्रशंसनीय बाजी मारली.
कर्नाटक राज्य संघातून खेळताना बेळगावच्या ऋतिक पाटील याने 65 किलो वजनी गटात तर सुजित शिंदे याने 75 किलो वजनी गटात सुवर्णपदकं मिळविली. 60 किलो वजनी गटात बेळगावच्या यश हुल याने पाचवा क्रमांक मिळवला. कर्नाटक संघाचे नेतृत्व श्रीधर बारटक्के यांनी केले होते.
बेळगावच्या या तिन्ही शरीरसौष्ठवपटूंना बेळगाव जिल्हा बॉडी बिल्डिंग असोसिएशनच्या पदाधिकाऱ्यांचे मार्गदर्शन लाभले आहे.
