बेळगाव ( bn7 news) : भारत विकास परिषदेतर्फे ‘गुरु वंदना – छात्र अभिनंदन’ सोहळा चिंतामणराव शाळेच्या सभागृहात अपूर्व उत्साहात पार पडला. या विशेष कार्यक्रमांतर्गत विविध शाळांच्या 30 उत्कृष्ट शिक्षकांना प्रशस्तीपत्र, शाल व स्मृतिचिन्ह देऊन सन्मानित करण्यात आले. त्याचप्रमाणे 60 विद्यार्थी-विद्यार्थिनींनाही यावेळी उत्कृष्ट छात्र पुरस्कार देऊन विशेष गौरविण्यात आले. सर्व शिष्यांनी आपल्या गुरूंना नतमस्तक होऊन वंदन केले व गुरूंनी त्यांना आशिर्वचन दिले.
प्रारंभी अक्षता मोरे यांनी संपूर्ण वंदे मातरम् प्रस्तुत केले. उपस्थित मान्यवरांच्या हस्ते भारतमाता व स्वामी विवेकानंदांच्या प्रतिमांचे पूजन करून दीपप्रज्वलन करण्यात आले. भारत विकास परिषदेचे अध्यक्ष विनायक मोरे यांनी स्वागत व प्रास्ताविक भाषण केले. प्रांताध्यक्षा स्वाती घोडेकर यांनी परिषदेचे राष्ट्रीय प्रकल्प, सामाजिक कार्य तसेच आगामी उपक्रमांची विस्तृत माहिती दिली. प्रा. अरुणा नाईक यांनी “गुरुवंदना” कार्यक्रमाची संकल्पना स्पष्ट केली.
